Esta nova tempada 21/22 encárase como histórica para o voleibol galego. Esta fin de semana, ademáis do equipo do Arenal Emevé en Superliga Feminina, tres equipos desputarán a máxima competición nacional na categoría masculina: Arenal Emevé, Boiro Voleibol e Intasa San Sadurniño, recén ascendido na pasada campaña.

Debemos sumar tamén a participación do Dumbría Voleibol e CV Vigo na Superliga Masculina 2 e Autos Cancela Zalaeta en Superliga Feminina 2, ademáis da participación en 1ª División Nacional Feminina do CV Bruxas, Aceites Abril Ourense e o Calasancias Voleibol, este último nas competicións Masculina e Feminina.

A promoción do deporte e o bo facer a nivel de formación en técnicos e xogadores a están a dar os seus frutos, xa que unha amplia cantidade de xogadores da base forman parte das primeiras plantillas destes clubs, que veñen empuxando desde abaixo ao conseguir grandes resultados nos Campionatos de España recentemente celebrados e chegando a ter presenza nas seleccións nacionais, tanto de categorías inferiores coma nas absolutas.

O Voleibol en Galicia conta actualmente con máis de 3600 licencias sen contar o programa XOGADE, e preto das 5000 en total, un síntoma do bo estado do noso deporte na nosa comunidade. En palabras do Presidente da Federación Galega de Voleibol, D. Jose ángel Luna Bargo, “isto é o fruto dun esforzo de toda a familia do Volei Galego, composta por xogadores/as, adestradores/as , árbitros, familiares e afeccionados, que todos os días desfrutan da súa paixón en pavillóns da toda Galicia se implican para facer mellorar o noso deporte. Dende a Federación estamos moi contentos con esta dinámica e seguimos nun proceso de mellora constante para acadar mellores resultados no apartado de rendemento, pero tamén a nivel de promoción e difusión, xa que contamos con pouca visibilidade nos medios pese ao gran momento que estamos a vivir”.

A Copa Galicia, que non se levara a cabo na súa edición de 2020 debido á crise sanitaria, volveu a San Sadurniño nunha edición con moito nivel, debido á gran actuación dos equipos galegos na pasada campaña.

O evento comezou o sábado ca competición feminina, na que participaban o Arenal Emevé, CV Bruxas, Aceites Abril Ourense e Autos Cancela Zalaeta. Na xornada de mañán as lucenses venceron en tres sets as de Bertamiráns, clasificándose para a final. Pola súa banda, as coruñesas do Autos Cancela Zalaeta impuxéronse ás de Ourense cun 3-1 que as colocaba na loita por revalidar o título conseguido na derradeira edición.

Co comezo da tarde, o CV Bruxas acadou a medalla de bronce nun disputado 3-2 contra o Aceites Abril dando paso á gran final. O partido que decidiría as campioas sería a repetición da edición anterior, pero esta vez con resultado inverso, ao vencer as de Lugo por 3-1 con Ainara Burgo como MVP da final.

O domingo continuose ca categoría masculina, enfrentando ao Arenal Emevé, Aldebarán San Sadurniño, Boiro Voleibol e Dumbría Volei. Abrirían a competición os de Lugo e Dumbría, nun partido que se solventou en tres sets, dando paso a un emocionante Boiro – Aldebarán que se decantou polos anfitrións en 5 sets.

Na loita polo terceiro e cuarto posto, o Dumbría voleibol vencería os de Boiro tamén nun 3-2, dando o pistoletazo á final que decidiría os campións masculinos da XXXVIII edición. No partido que pecharía a fin de semana, o Arenal Emevé conseguiría o dobrete ao superar aos de Sansadurniño por 3-1 con Joaquín Alzueta como xogador máis valorado.

Nas cerimonias de premiación, o Alcalde do Excmo Concello de San Sadurniño D. Secundino García Casal e o Presidente da Federación Galega de Voleibol D. Jose Ángel Luna entregarían os galardóns aos equipos participantes. De novo grazas a todos os clubs pola súa implicación neste campionato, así coma ao club local e ao Concello de San Sadurniño polo apoio no desenvolvemento do torneo.

A Federación Galega de Voleibol, despois de realizar a visita de inspección técnica programada para supervisar as instalacións do IES Rodeira, e ante a imposibilidade de adecualas a tempo para a celebración nas datas previstas, vese na obriga de trasladar a sede de celebración da XXXVIII Copa Galicia ao Pavillón Municipal de San Sadurniño, mantendo horarios e datas.

Dende a nosa organización lamentamos todo tipo de inconvinte producido a clubs, xogadores/as e afeccionados, e recordamos que a seguridade dos nosos deportistas é o primeiro en calquera dos eventos organizados pola FGVB. Do mesmo xeito tamén queremos agradecer aos clubs participantes a súa compresión e apoio ante esta situación, así coma os diversos ofrecementos para albergar este campionato.

Despois do parón debido á crise sanitaria, a competición galega volverase a desputar neste 2021 iniciando a competición de pista da tempada 21/22 os próximos días 25 e 26 de setembro en San Sadurniño.

Nun ano no que o Volei Galego terá ata 5 representantes nas máximas categorías do voleibol nacional, a competición preséntase como unha cita moi atractiva para todos/as os/as amantes do deporte en xeral, ao asegurar unha fin de semana co mellor voleibol autonómico e no que se loitará polo primeiro título da tempada entre os 4 mellores clasificados masculinos e femininos da 20/21.

A competición comezará ca quenda feminina o sábado 25, co Arenal Emevé (Liga Iberdrola), Autos Cancela Zalaeta (Superliga 2), CV Ourense Aceites Abril (1ª Nacional) e CV Bruxas (1ª Nacional) loitando polo título en catro partidos programados e nos que as coruñesas defenderán o título conseguido en 2020 en Santiago de Compostela ao vencer na final.

No apartado masculino o Rotogal Boiro (Superliga), Arenal Emevé (Superliga) , Aldebarán San Sadurniño (Superliga) e Dumbría Voleibol (Superliga 2) pecharán con outro gran espectáculo deportivo o evento, cas semifinais programadas para a mañán do domingo e os partidos decisivos da tarde. Os lucenses defenderán un título que estará máis caro que nunca, o que asegura emoción na pista.

Os enfrentamentos previstos son os seguintes:

Dende a Federación Galega de Voleibol queremos agradecer ao Excmo. Concello de San Sadurniño pola súa colaboración no proxecto, así coma ao club local o Aldebarán San Sadurniño, que farán posible a volta dunha competición que se achega ás 40 edicións.