Hoxe é un día especial para todo o voleibol galego, pois felicitamos a un dos grandes referentes da nosa comunidade, D. Jose Liboreiro Domínguez, quen tras décadas de incansable dedicación ao noso deporte comeza unha nova e merecida etapa de xubilación.
O nome de «Libo» vai ligado de forma indisoluble á historia do voleibol en Galicia. Foi seleccionador galego, membro da Asemblea da Federación Galega de Voleibol, formador da Federación Galega e da RFEVB e un dos membros fundadores do Club Voleibol Noia, no que exerceu como directivo dende o seu nacemento ata o día de hoxe.
Ao longo da súa carreira, Liboreiro destacou non só polo seu coñecemento e experiencia, senón tamén pola súa capacidade para formar e inspirar a novas xeracións de xogadores/as, adestradores/as e directivos/as. Foi, sen dúbida, unha peza clave no desenvolvemento do noso deporte en Galicia, sempre cunha visión de futuro e un traballo constante pola mellora do voleibol en todos os seus ámbitos.
Dende a Federación Galega de Voleibol, queremos expresar o noso máis sincero agradecemento polo seu exemplo, a súa paixón e a súa dedicación sen límites. Todo o volei galego únese para desexarlle o mellor nesta nova etapa, chea de novos retos e, sobre todo, de moito descanso merecido.
Grazas, Libo, por todo o que fixeches polo voleibol galego.
