A praia de Riazor puxo o broche de ouro a dúas semanas consecutivas do máis alto nivel de vólei praia coa disputa do Campionato Xunta de Galicia Sénior e o Trofeo Cidade da Coruña (1*), proba integrada no Circuíto Nacional de Vóley Playa (CNVP). A area herculina volveu ser o epicentro do deporte estival na comunidade, reunindo ás mellores parellas do panorama galego e estatal nunha dobre cita que destacou pola calidade do xogo e o excelente ambiente nas bancadas.
A primeira das grandes citas coroou aos novos campións autonómicos absolutos. Na categoría masculina, a parella formada por Fernández e Queiro subiu ao máis alto do podio tras completar un torneo impecable, acompañados por Guiñazu e Loureiro na segunda posición e Sánchez e López na terceira. No cadro feminino, Rodrigues e Díaz proclamáronse campioas galegas tras superar nunha disputada final á dupla Milesi e Lacerda, mentres que Barrios e Andric ocuparon o terceiro chanzo.
Tras a proba autonómica, Riazor acolleu a competición do Circuíto Nacional, atraendo a duplas de referencia en ambas categorías. Tras varias xornadas de máxima esixencia e finais de infarto, a parella Aba / Aba alzouse co título e o ouro no cadro masculino, mentres que Monteiro / Sevillano proclamáronse campioas na categoría feminina.
Desde a Federación Galega de Voleibol quíxose agradecer de xeito moi especial o apoio institucional do Concello da Coruña e a Xunta de Galicia, a indispensable colaboración de Gadis, o compromiso solidario da Asociación Española Contra o Cancro (AECC), así como o traballo indispensable de todo o persoal de organización, voluntarios, árbitros e patrocinadores que fixeron posible o éxito deste gran evento. Con esta dobre cita na Coruña, o vólei praia galego consolida unha das súas etapas máis potentes do calendario de verán.
