A tempada de vólei praia 2026 entra na súa recta final. Tras meses de intensa competición por toda a xeografía galega, a area prepárase para acoller os últimos e decisivos eventos nos que se definirán os títulos autonómicos das categorías inferiores.
Nova data para a proba do Circuíto Provincial en Sada
O Circuíto Provincial da Coruña de Vólei Praia de Categorías Inferiores configúrase este verán a través de tres probas: A Granxa (18 e 19 de xullo), Rianxo (1 e 2 de agosto) e Sada.
A proba de Sada, prevista inicialmente para os días 4 e 5 de xullo e aprazada por alerta de calor, conta xa con nova data de celebración e queda finalmente definida para o 22 e 23 de agosto. Esta proba disputarase na Praia das Delicias e estará aberta ás categorías alevín, infantil, cadete e Sub-19.
⚠️ Inscricións: Co cambio de data, as inscricións para esta proba reabriranse o vindeiro martes, 11 de agosto.
Sumando os puntos obtidos nas tres xornadas do circuíto, determinarase un ranking propio que definirá os campións por categoría, de forma paralela ao ranking galego e que terá a súa cerimonia de premiación independente tal coma o ano pasado.
Campionatos Galegos de Categorías Inferiores – Sada (29 e 30 de agosto)
O derradeiro fin de semana de agosto celebraranse en Sada os Campionatos Galegos Finais de Vólei Praia de Categorías Inferiores (evento trasladado a esta localidade para facilitar a súa celebración).
Estas fases finais serán probas pechadas para as 8 mellores parellas do ranking que participen e determinarán os campións galegos da tempada en cada categoría:
- Sábado 29 de agosto: Categorías Sub-21, Sub-17 e Alevín.
- Domingo 30 de agosto: Categorías Sub-19 e Sub-15.
A entrega de premios realizarase na propia praia ao remate de cada categoría, e as parellas campioas conservarán os puntos acadados nesta proba para a seguinte tempada.
Peche e inicio da nova tempada
Cos Campionatos Galegos darase por pechada a actual campaña de vólei praia, dando paso o 1 de setembro ao comezo oficial da nova tempada 2026-2027.
Desde a Federación Galega de Voleibol queremos agradecer a todos os clubs, deportistas, familias e promotores o gran traballo e esforzo que están a realizar ao longo de toda a tempada.
