A praia das Delicias de Sada acollerá a derradeira fin de semana de agosto, os días 29 e 30, os Campionatos Xunta de Galicia de Vólei Praia de Categorías Inferiores.
O prazo de inscrición xa se atopa aberto e o trámite deberá realizarse exclusivamente a través da plataforma oficial de iSquad co límite do vindeiro martes 25 ás 16:00 horas. Cómpre salientar que estas fases finais serán probas pechadas ás 8 mellores parellas do ranking que formalicen a súa inscrición. O corte definitivo das devanditas 8 parellas clasificadas por categoría darase a coñecer xusto despois da disputa da proba do Circuíto Provincial que se celebra esta fin de semana en Sada (22 e 23 de agosto).
A competición distribuirase nas seguintes xornadas:
- Sábado 29 de agosto: Categorías Sub-21, Sub-17 e Alevín.
- Domingo 30 de agosto: Categorías Sub-19 e Sub-15.
A entrega de premios terá lugar na propia praia ao remate dos cadros de xogo de cada categoría, mantendo as parellas campioas os puntos acadados nesta proba para o inicio da seguinte campaña. Cos Campionatos Galegos porase o punto e final á actual tempada de vólei praia, dando paso o vindeiro 1 de setembro ao comezo oficial do curso 2026-2027.
