A sede do organismo provincial reuniu onte a deportistas, clubs e familias para premiar aos campións e campioas das categorías inferiores.
A FGVB destacou o apoio institucional e o gran traballo dos concellos sede que fixeron posíbel o desenvolvemento da competición ao longo da tempada.
A sede da Deputación da Coruña acolleu a tarde de onte a Gala de Premiación do Circuíto Provincial da Coruña de Vólei Praia 2026, un evento no que se recoñeceu o esforzo, a dedición e os excelentes resultados acadados polas parellas participantes nas distintas categorías inferiores durante todo o verán.
O acto serviu como peche oficial a un circuíto que volveu ser unha referencia no calendario do deporte de base autonómico, destacando polo alto nivel competitivo e pola gran participación de clubs e deportistas de toda a provincia.
Recoñecemento ás categorías inferiores
Durante a cerimonia fixose entrega dos correspondentes galardóns e medallas ás parellas mellor clasificadas no ránking final do circuíto nas categorías alevín, infantil, cadete e Sub-19, tanto en modalidade masculina como feminina.
As e os mozos deportistas recibiron o agarimo dos asistentes nunha xornada festiva que puxo de manifesto o gran momento e a boa saúde da que goza o vólei praia de base na provincia.
Agradecemento ás sedes e ao apoio institucional
Desde a Federación Galega de Voleibol quíxose trasladar un agradecemento moi especial á Deputación da Coruña polo seu constante respaldo e compromiso co desenvolvemento e promoción do voleibol na comunidade, permitindo achegar a competición de praia a centos de mozas e mozos.
Así mesmo, a entidade federativa fixo extensible este agradecemento a todos os concellos sede de Rianxo, Sada e San Sadurniño, cuxa implicación e facilidades loxísticas foron fundamentais para o correcto desenvolvemento de cada unha das probas disputadas ao longo da xeografía provincial, así como a clubs, técnicos, árbitros e familias por facer posíbel o éxito desta edición.
