A Federación Galega de Voleibol (FGVB) pechou de xeito sobresaínte a organización do Campionato de España de Seleccións Autonómicas (CESA) 2026, celebrado recentemente na cidade de Lugo. O evento supuxo un dos maiores retos loxísticos e de xestión da historia recente da federación autonómica, consolidando a Galicia como un referente organizativo de primeiro nivel no panorama do voleibol nacional de base.
Coordinar un torneo de tales dimensións esixiu un despregamento humano e técnico sen precedentes para acoller as catro categorías en liza (Infantil e Cadete, tanto masculinas como femininas). Para responder ás esixencias da competición, o comité organizador habilitou un total de 4 pavillóns deportivos distribuídos pola cidade, nos que se instalaron 16 pistas de xogo simultáneas de xeito permanente, 9 de elas creadas desde cero.
A magnitude do campionato reflíctese de xeito directo nas súas cifras de participación, reunindo en Lugo a máis de 1.200 deportistas e técnicos procedentes de todas as comunidades autónomas. Para garantir o correcto desenvolvemento deportivo do evento, a federación coordinou un amplo dispositivo humano que incluíu a 50 árbitros oficiais en pista, aos que se sumou un equipo humano de organización para dar cobertura á loxística, estatísticas e control de accesos.
Excelentes resultados na enquisa de satisfacción das delegacións
Como parte do compromiso da Federación Galega de Voleibol coa mellora continua e a calidade organizativa, tras a finalización do torneo realizouse unha exhaustiva enquisa de satisfacción entre as delegacións participantes, cuns resultados finais que ratifican o éxito de xestión:
- Valoración global: O evento obtivo unha puntuación media global de 7.23 sobre 10.
- Expectativas: O 88,5% das respostas indicaron que o campionato cumpriu con todas as súas expectativas a nivel de evento.
- Calidade comparada: O 88,5% dos participantes afirmou que a organización en Lugo foi superior á de torneos similares celebrados noutras comunidades.
- Prescrición: Un rotundo 96,2% das delegacións enquisadas declarou que recomendaría a experiencia e a asistencia a este evento a un amigo.
Estes indicadores reflicten de xeito obxectivo o grao de excelencia alcanzado e o alto grao de satisfacción dos equipos respecto aos servizos de competición, aloxamento e atención recibida na cidade.
Agradecemento institucional
Desde a Federación Galega de Voleibol quese facer un recoñecemento público e mostrar o máis sincero agradecemento ás institucións cuxo apoio resultou estratéxico e fundamental para sacar adiante un reto desta envergadura. A implicación activa do Concello de Lugo, da Xunta de Galicia e da Vicepresidencia da Deputación de Lugo demostrou que a colaboración entre entidades é a ferramenta clave para situar ao deporte galego na elite nacional.
O seu respaldo técnico, económico e loxístico fixo posible que o CESA 2026 sexa recordado como un fito organizativo impecable, deixando ademais un impacto económico e deportivo moi positivo na provincia e en toda a comunidade autónoma.
