O futuro do noso deporte ten unha cita marcada no calendario: o vindeiro domingo 29 de marzo, a localidade de Rianxo acollerá unha nova e emocionante xornada da Copa Benxamín. Este encontro está pensado para que os máis cativos e cativas sigan sumando experiencias, aprendizaxe e, sobre todo, moita diversión arredor do balón.
A organización desta proba é froito do esforzo conxunto entre a Federación Galega de Voleibol, o Concello de Rianxo, a Deputación da Coruña e o Voleibol Rianxo. Este apoio institucional e técnico é o motor que permite que a canteira galega conte con espazos de calidade para medrar deportivamente.
Participación e inscricións: Seguindo a normativa da competición, os clubs poderán anotar un máximo de 5 equipos por entidade. Cada conxunto deberá estar composto por un mínimo de 4 deportistas e un máximo de 10. As inscricións formalizaranse enviando o formulario G11 debidamente cuberto ao correo correo@volei.gal.
Prazos de xestión:
- Luns 23 de marzo (20:00h): Peche para a tramitación de licenzas individuais.
- Martes 24 de marzo (20:00h): Límite para o envío de formularios de inscrición de equipos (G11).
- Mércores 25 de marzo: Publicación das listaxes provisionais.
- Xoves 26 de marzo: Publicación das listaxes definitivas.
Dende a FGVB animamos a todos os clubs a participar nesta festa do #voleigalego base.
Descargue o formulario G11 na seguinte ligazón.
